FENOMANANA
Dafy Noely
Ombay i Tsiafajavona
dia dikao Ankaratra,
f’izaho tsy hiavonavona
raha toa ka mbola taratra
mazava sady miavaka,
mirenty sy madio
no entinao mandravaka
ny aliko eto anio.
Tritriva ‘ndeha lalovy.
Sidino koa Sakay
f’izaho tsy hiantso zovy
fa avy dia handray
ny ilom-pahazavana
vinimbinao ho ahy,
mirotsaka toa mana
mamoky ny fanahy.
Serano ny any Alaotra.
Dingano i Farahantsana
fa tena tiako loatra
ny soratrao mirantsana
tsy mety mankaleo…
Koa ‘ndeha fenoy soratra
ny lanitro fa tsy eo
ny johary izay mpisompatra
Dafy Noely Mpanoratsora-poana
16/11/2016
Dafy Noely: mpanoratra mitety ny lohasaha sy havoanan’ny lohahevitra maro samihafa ; indraindray mampihomehy, mazàna mampalahelo fa matetika manetsika ny saina sy ny fon’ny mpamaky hamerina hamaky fanindroany. Tsy tononkalo ny ahy ireny, hoy izy … fa soratsora-poana.