Teboka...
Ny maoza.
Eto izao no farany
Mbola io lay hazo nanoratanao ny anarany
Tanaty sary fo :
(Teboka ankiroa)
Eto misy marik'ilay oroka voalohany,
Dia lasa ny ambiroa
Mbola sarotra ampanginina
Ny halatra fitia ... Nefa moa maninona
Izany rehefa tia
Saingy ...
(Teboka ankitelo)
Eto alahelo no sisa mitamberina
Etsy ianao haterina
Fa ny antsika efa tsy anjara
Ny fitiavana voalohany hono
Mivalon-ko tantara
Tsy mino ve ianao?
(Baraingo)
Izany no lalàn'izao tontolo izao ;
(Teboka amam-paingo)
Tsy maintsy nandalovana
Dia mbola io lay hazo mitahiry fahatsiarovana
Mikopakopa-tanana
Ianao anie tsy foina
Taminao niafiko ny mamy sy mangidy
Sarotra hohadinoina
Mbola hotadidy ireny vita ireny
(Mbola tiako ianao)
Anaty fonon-teny
Saingy...
Tsy maintsy nofaranana
Dia izao no zava misy...
Etsy indry tantanana
Tanteraka amintsika lay hoe
" mijanona ho mpinamana "
Teboka famaranana./.
Ny maoza
15 juillet, à 03:18
Ny maoza hono dia olo-noforonina ho an'ny fiarahamonina... mpanoratra mandalo sedra ao amin'ny havatsa upem Miarinarivo.